اين القانون

ملحوظه ( المقاله ده فيها قله ادب وكلام خارج ولي شايف نفسه انسان مرهف المشاعر يبتعد عنها وميبعتش ليه ويقلي المقاله فيها كلام خارج )0

الحكومه اتجننت والله بكلم جد انا ها حكي لكم اللي حصل وانتم احكموا طبعا كلكم فكرين الدكتور ايمن نور ربنا يفك سجنه ويسجن اللي سجنه ليخده ( بصراحه اصله طول قوي كفايه بقي عليه كده القبر عيزه ) المهم الدكتور ايمن نور اترفعت عنه الحصانه كان يوم جمعه تصدقوا يوم عطله رسميه ومش كده وبس لا ده كمان كان فتحي سرور مسافر ومضاء في المطار وعدلي راح الوزارة يوم جمعه وكمان نقابه المحامين مضت يوم جمعه وكمان البوليس راح فتش الشقه بتعته ومقر الحزب في نفس يوم الجمعه واتقبض عليه برده يوم الجمعه بصراحه اصله كان يوم جمعه مبروك وكان النشاط اللي كلنا عرفينه في الحكومه بتعتنا النشيطه زياده حبتين والنصيبه بقي ان النشاط ده مشفنهوش مع اللي قتل 1300واحد في عبارة الموت لكن نقول اه ربنا اهو قادر يخدهم والله يجماعه انا لو اطول احجز في المقصورة الرئيسيه عشان اشفهم في جهنم متاخر لكن انا املي في ربنا يحقق لي امنيتي .

شوفوا الكلام ده كله قديم طبعا انتم بتقول الواد ده اتجنن ولا ايه هو بيكلم عن حاجه فاتت عليها سنه انا هشرحلكم انا ليه اتكلمت اصل مصر بتطور وانا حولت اقارن بين مصر من سنه ومصر الان ( بعد جواز الشملول ) يعني علي اللي وصلنا اليه لاتقولي يمضوا يوم جمعه ولا سبت بلي وجع دماغ وكلام فاضي احنا دلوقتي مبقاش عندنا حتي احترام للقانون بقي الريس يامر والكلاب تنفذ قبضوا علي اتنين اعضاء مجلس شعب مساء الاحد 29/4 ونواب البرلمان المصري لديهم حصانة ضد الاحتجاز او الملاحقة القضائية ما لم يضبطوا في حالة تلبس بارتكاب جناية و النائبين هما صبري عامر ورجب ابو زيد انا بقي سوالي واضح وصريح يمبارك انت قبضت عليهم تحت اي قانون قبضت عليهم فهمني عرفني يمكن عزرائيل هوا اللي يقبض عليك المرة الجايه عن قريب انشاء الله ازاي تقبض علي عضوين في مجلس الشعب وهما اصلا معاهم حصانه والله انا هتجنن انا قولت يواد يمكن قانون ارهاب بس علي حسب علمي ان قانون الارهاب لسه مطبقش ومتعملش ولا اتصاغ اصلا وكمان القانون ده عملين ينبحوا في صوتهم ويقنعونا انو قانون للارهابيين بتوع المتفجرات مش للمعارضين بصراحه البلد باظت والخراب زاد عن الحد يبشر اصحوا فوقوا البلد اتخربت الراجل ده ولا بيحترم قانون ولا دستور ده كبر وخرف ومش عايز حد يقلي اصلهم نواب اخوان وبتاع يعني ايه اخوان انا بكلم عن قانون ولازم الكبير قبل الصغير يحترمه ولا احنا بقينا في عزبه مبارك وانهي كلامي بكلمه روح يشيخ ربنا يهدك

قاموس مبارك

المراقبه الدوليه للانتخابات : تدخل أجنبى *
القانون الدولى : القوانين الوطنية تجب *

المبادرات الدولية للديموقراطية فى الشرق الأوسط : الآصلاح لا يمكن فرضة من الخارج ولا من الداخل

. المطالب الشعبية للاصلاح : تخريب و زعزعة للاستقرار *

· منظمات حقوق الانسان الدولية : منظمات مشبوهة *
الولايات المتحدة الأمريكية : المتآمر الرئيسى فى مؤامرة تدمير العرب و المسلمين.(واحنا مالناش دعوه)0

اسرائيل : المتآمر المساعد فى مؤامرة تدمير العرب و المسلمين. (واحنا مش عرب ولا مسلمين)0
. المجتمع المدنى : مراكز للجاسوسية *
. المطالبون بالحرية : ارهابيون*

· الناشطون و المطالبون بالديموقراطية: خونة و عملاء لجهات أجنبية *
· حرية الصحافة : حرية شتيمة أمريكا و اسرائيل فقط وغير كده انفلات *
الوطنية : عبوديه السيد الرئيس لانه الوحيد الذي لا يخطي 0
. معونات و تبرعات أجنبية للمجتمع المدنى : ثمن الخيانة *

. معونات و تبرعات أجنبية لزوجة الرئيس و نجلية : تعاون دولى*

· قانون الطوارئ : يطبق فقط على الارهابيين و تجار المخدرات والمسلمون
· تجار المخدرات : شركاء البزنيس لنجلى الرئيس*
· الارهابيون : الاسلاميون *
· الدين : وسيلة لاخضاع الشعب و السيطرة علية و أيضا لابتزاز الدول الغربية *
· الديموقراطية : الفوضى *
· الانتخابات : اذا تركت بلا تزوير سينقض الاسلاميون على الحكم *

· تداول السلطة : مستحيل *
· السلام : تدمير العدو نهائيا *
· الاصلاح : بعد السلام *
· حقوق الانسان : بعد السلام *
· الرخاء : بعد السلام *

· رفعة الوطن : بعد السلام *
· الشفافية : بعد السلام *
· المحاسبة : بعد السلام *
· العدالة : بعد السلام *
· التمية البشرية : بعد السلام *
· المال العام : مال الحاكم وبس ولو اتبرع للشعب بحاجه يبقي كتر خيره *
· الاقتصاد : النهب المنظم والغير منظم للشله الحاكمه *

الحامي هو الله

والله انا مررتي هتتفقع من اللي بيسموا نفسهم صحفيين وهما عبيد مبارك بالكتير.

نقول اه ربنا يخدهم ليهديهم انا النهارده هتكلم عن عبد من عبيد مبارك اسمه ممتاز القط هو عبد بس مبيعرفش يخدم سيده كويس للاسف غبي عرفين المثل الشعبي اللي عندنا بيقلك جه يكحلها عماها اهو هوا ده بالظبط ممتاز القط كتبلي مقاله بتاريخ يوم السبت 28/4 في اخبار اليوم بتقول من غيرك يحمينا

والله لو سألت بوذي او مجوسي او حتي كافر هيقلك ربنا لكن عبيد مبارك طبعا هيقول مبارك مهو اللي خلقهم واليه يرجعون و في الاخر يقلك العمال كمان بيقولوا كده اخرس يا عبد مبارك دول العمال العبيد اللي زييك اللي بياخدوا تصريح من امن الدوله عشان يحضروا المؤتمر بتاع سيدهم وربهم مبارك لكن عمال مصر في اعتصامات واحتجاجات علي الظلم عمال مصر اشرف من انهم يقول ان اللحميهم مبارك يا عبد مبارك الحامي هو الله وحسبنا الله ونعم الوكيل فيكم يا عبيد السلطان

وده اللينك بتاع المقال الاسود بتاعه

http://www.akhbarelyom.org.eg/akhbarelyom/issues/3260/0101.html

الحزب الوطني ومجلس الشعب

مهما قولت من كلام مش هيعبر عن اللي في الصور لكن نعمل ايه قدرنا ان دول هما اللي يكون في المجلس ويشرعوا القوانين اتفرجوا علي اعضاء الحزب الوطني في المجلس بيعملوا ايه

اخلاص في حب مصر وعمل جاد وتضحيه

السهر علي راحه مصر

يقظه وتفاعل مع قضايا الجماهير

الاخلاص في تنفيذ وعود السيد الرئيس

الفقي اهوا سهران لراحه الشعب وهو ده الفكر الجديد اللي بينادي بيه

وشك نحس يا ريس

وشك بقي نحس ياريس خسرت الاهلي الماتش وكمان اربعه هوا انت مش سيبنا في حالنا ابداً حتي الكورة منكد علينا ربنا ينكد عليك دنيا واخرة علي العموم انا مش قادر اكتب اكتر من كده لاني حزين وكان نفسي متحضرتش يمكن كان ربنا نصرنا لكن هنعمل اه قدرنا وادي الله وادي حكمته بس يارب تكون اخر مرة نشوفك فيها في ماتش وبعدين طالما انت رايس والناس بتحبك زي مبيقولوا كلابك المخلصيين بتحط نفسك ليه في القفص الزجاج ولا يمكن بتشبه نفسك بالاسد منتم الاتنين بتخشوا القفص يريس يا اسد

وراء الشمس

حد شاف حلقات وراء الشمس اللي بسببها حققوا مع المقدمه للبرنامج ورحلوها وراء الشمس انا هاحط ليكم لينكات لكل جزاء

وده الجزء الاول

http://www.el-ma7rousa.com/shows/elma7rousa_jsc_part1.wmv

وده الجزء الثاني

http://www.el-ma7rousa.com/shows/elma7rousa_jsc_part2.wmv

بعد ما حطيت ليكم اللينكات ياريت اللي مشفش البرنامج ينزله ويشوفه ويعرف ان السكوت اصبح جبن والحل هوا الكلام واي حد يتعرض لمعمله سيئه من كلاب الشرطه لازم يبلغ النيابه ويروح للمحامي العام والنائب العام والصحف المستقله واي حته يوصل فيها صوته وميسكتش وميخفش من كلاب الشرطه دول لازم يخدو بالجزمه ده عالم تخاف ولا تختشيش و اقسم بالله دول بيكون كلاب قدام اللي اكبر منهم ودول ناس عندهم مرض نفسي والسكوت بيخليهم يفتكروا اننا ضعفاء و بقول للعادلي ادب رجالتك ليجيلك يوم وتكون في المحكمه النهايه قربت .

العدو الموريتاني

عرفين النهارده هنكلم عن ايه انا عارف ان اغلبكم سمع عنها ومش يعرفها عشان كده حطيت صورتها على الخريطه لكن علي العموم هعرفكم عليها الاسم موريتانيا عدد السكان : 2,912,584 نسمة (2003) نسبه الاميه 51% كفايه كده تعريف ابدا اشرح لكم ليه قلت عليها عدو لانها مفيهاش راجل يحصل علي نسبه 99.9% زي الرجاله و الملوك و الروساء الندامه اللي عندنا بقي الراجل اللي اسمه اعلي ولد محمد فال يتنازل عن الحكم ويعمل انتخابات وكمان ميرشح نفسه ولا حد من القياده العسكريه ولا حتي المحروس ابنه شوف الخيبه وفي الاخر يقولوا انهم عرب احنا متبريين منهم والنصيبه كمان الراجل اللي ينجح ده يحصل علي نسبه 51% اه ده وراحوا فين ال 49% وكمان بعد مينجح يدي المنافس صلاحيات اكتر من رئيس الوزراء ده يعقل بدل ميسجنه يديله صلاحيه ده كان المفروض عشان يثبتوا لينا عروبتهم يلفقوا ليه تهمه حلوة ولا ولسه كمان الا ايه كانوا عيزين حكام عرب يشركوا في التنصيب ده بعدكم احنا بنروح فرنسا بس وممكن السنغال لكن دوله ديمقراطيه وعربيه نحن نرفض وندين وبعدين احنا الحمد لله عندنا راجل رئيس زي الفل عسل بيجيب ال 99.9% من غير اعاده وكمان بيعمل نيو لوك ويسبغ ويتنمجه لزوم الوجاهه وبعدين حكمنا زي الفل راجل طول عمره بيقول كله الا المساس بمحدودي الدخل لحد الحمد لله متخلصنا من كل محدودي الدخل في مصر واصبح عندنا مشكله بسيطه وهما معدومي الدخل بس انشاء الله مع الوقت هيموتوا ويريحونا ونبقي حلينا مشكلتنا بس بجد انا عايز اسال موريتانيا سؤال مبتكسفيش من نفسك وانتي محطوط علي اسمك دوله عربيه دانا لو موريتاني لكنت طلبت اننا نعتزل الجامعه العربيه وعلي العموم يوضع سره في اضعف خلقه وسلام يا عرب انا سيبك ورايح موريتانيا الديمقراطيه

الحزب الوطني والناس

جلست افكر وافكر وافكر لكي اعبر عن ما يفعله الحزب بنا ولاكن وجدت كلام كثير ولم اعرف من اين ابدا ولكن وبعد مشقه وجدت اسهل طريقه لمعرفه ماذا يفعل بنا الحزب الوطني هي صورة ولاكنها المختصر المفيد انظر اسفل

.
.
.
.
.
.
.
.

.
.

الصحافة الارهابيه

انا بجد خلاص هتجنن مبقتش عارف هو ايه اللي مش ارهابي ده انا شكيت في نفسي المهم نخش في الموضوع عمنا فتحي سرور قال في المؤتمر الصحفي المشترك مع الدكتور مفيد شهاب وزير الشؤون القانونية والمجالس البرلمانية، الذي عقد أمس علي هامش المؤتمر الأول لمكافحة الإرهاب بمركز دراسات جريدة «الجمهورية» ـ: إن قانون مكافحة الإرهاب سيطبق علي الصحف أو أي وسيلة إعلام تقوم بنشر الأعمال الإرهابية للجماعات المحظورة. وأشار إلي أن الإعلام سيعتبر مساعداً للإرهابيين في هذه الحالة. طيب ازاي هيساعد بعد ما العمليه الارهابيه تكون اتعملت قولت يمكن يساعد بضمير الغائب اصل حكومتنا نصحه ومتفتهاش النمله وخصوص فتحي موافقات ( نسبه الي كلمه " موافقه " التي لم تتغير من لسانه ) وبعدين نشوف مقاله للمخبر محمد علي بتاع الجمهوريه كاتب لينا ان مقلش الكلام ده وبعدين فتحي مش بيطلع منه العيبه ده راجل مبيعرفش ينام لو حس انو قال كلمه غلط ده تقي وبتاع ربنا وطبعا محمد علي عمل اللي عليه وزياده مهي شغلته تلميع الحرميه مع اني واثق ان محدش بيقراء له غير الوزراء والعائله الملكه المهم انا سمعت الكلام ده قلت الحمد لله الراجل مظلوم هي الجرايد المستقله متصدق جنازة وتشبع لطم وبعدين حصل ما لا يحمد اتاري كان في صحفي من المحور بيسجل اللقاء وفعلا فتحي قال كده اي نعم لسه فتحي مردش واحتمال كبير ميردش ولا يمكن يرد ويقول متفبريك زي شريط عماد الكبير ولا ممكن يرد ويقلنا " ولهذا ولتلك فعلا لاجل وحبذا لو ماذا اذا " وطبعا محدش يفهم حاجه وبكده يبقي عمل اللي بيعمله كل مرة وطلع زي الشعرة من العجينه ولغبط الناس لاكن المشكله مش فيه هو كده كده هيطلع منها ده برده فتحي سرور وهيعمل للكلمه الف معني ده تخصص لغبطه المشكله بعد الخبر والنفي والتاكيد هنسمع كلام مين ومين هنصدقه وبعدين باي صفه اتكلم فتحي سرور امال الترزي اللي كان معاه اللي اسمه مفيد شهاب وزير الشؤون القانونية والمجالس البرلمانية وظيفته ايه ولا هيا بقيت كوسه وكل واحد يكلم علي مزاجه صحيح ما جمال بيكلم عن النووي ونظيف رئيس الوزراء الموقر بيفتتح كباري ( احنا الدوله الوحيده اللي رائيسها و رئيس وزراء بيفتح فيها كباري اظاهر من قلت الفتح ) يناس حرام عليكم ملعون ابو كده ارحموا الناس ربنا يخدكم بقي الرئيس يفتح كوبري ورئيس الوزراء يفتح كوبري اصغر وابن الرئيس يكلم عن النووي وفي الاخر تقللنا مفيش حاجه اسمها توريث ياريت نشوف نظام كل واحد ليه وظيفه مش نظام هز الوسط . سلام يا شعب مصر

كفاية الارهابيه

وانا قاعد باقلب في النت زي كل يوم وبشوف ايه الجديد لحظت حاجه غريبه في موقع الحزب الوطني ( حزب اللصوص ) وجريدة الحزب انا بصراحه مش عارف ابدا منين لكن هقلكم وانتم احكموا اولا في موقع الحزب لقيت عملين تقرير عن سجناء الانترنت والحرية علي الانترنت والشهاده لله لقيتهم كتبين رائ المنظمات العالميه و هي فاضحه حكومة الحزب وبتقول عليه حجب بعض المواقع الإلكترونية ومراقبة الاتصالات علي الإنترنت دون الحصول مسبقا علي إذن قضائي ففرحت انهم ابتدو يحسو ويبقي عندهم دم وده لينك التقرير http://www.ndp.org.eg/ar/News/ViewNewsDetails.aspx?NewsID=18074

وده كمان صورته

انا بصراحه قولت اخيرا الحكومه بقي عندها دم وبعدين كانت هتجيلي جلطه لما شوفت جريدتهم السوداء كاتبالي وبالبنط العريض نظر " دعوي حجب المواقع الإرهابية 5 مايو المقبل " انا شفت كده قلت هما هيقفلوا لينا مواقع بن لادن واعوانه احسن بس مدام هما كده ضد الارهاب وناس محترمين مقفلوش ليه القناة اللي شغاله من النايل سات وعماله تدعوا العراقي يقتلوا في الشيعه قمت قلت يواد ده نكرة وده نكرة اما اكمل قراءة في الجرنال الاسود ده لقيتلك كتبين مالم يصدقوه عقل ال ايه " من أهم هذه المواقع التي يطالب بغلقها موقع الشبكة العربية لمعلومات حقوق الإنسان ومركز هشام مبارك والمرصد المدني وموقع حزب الغد، والنديم، والنور وكفاية. " انا بيني وبين نفسي كان هيجيلي جلطه هي كفايه والغد بقم ارهابيين ينهار اسود يبقي خلاص هيطبق علينا قانون الارهاب الاسود قمت علي طول حطيت ديل الجلبيه في سناني وروحت مقر كفايه شلت اسمي وقلتلهم مش عايز اعرفكم ورحت لمقر الحزب الوطني الشقيق وطلعت اجدعها كرنيه وقمت خارج الشارع وقايل " بروح بالدم افديك يابن سوزان " وده لينك القضيه http://www.ndp.org.eg/alwatanyalyoum/Topics/ViewTopicDetails.aspx?TID=2952

اللي هيحكموا بعدها حركه كفايه و الغد كارهابيين وانا بصفتي من كفاية سابقاً هرشد عن اماكن السلاح والذخيرة والطيران والقنابل النوويه لدي الحركه وسلملي علي الاصلاح وبكده يبقي بداً في تطبيق الدستور الجديد وتطبيق المادة 179 علي الارهابيين من امثال كفاية والغد وكل من يفتح بقه وسلام لحسن بجد والله انا اتعقدت

أنت عارف انا ابن مين

كثيراً ما نسمع مقوله " أنت عارف انا ابن مين " وهذه المقولة انتشرت لعدة اسباب اهمها ثقة الناس ان للوسطه والمحسوبيه دور كبير داخل المجتمع المصري ويا عيني لو اللي بيقلها رفع موبيله وقال يدادي تلاقي الظابط اللي كان شحط من خمس دقائق بقي فرخه وهذه هي الطائفية الحقيقية الموجودة في مصر طائفية الوسطه والمحسوبيه لا يوجد في مصر طائفية دينيه ومن يدعي هذا فإنه لا يعرف المصريين . معني الطائفية هيا تميز طائفة من الناس علي طائفة اخري بالنظر للمجتمع المصري سنجد انه ملئ بالطائفية ليست الدينية اكرر ولكن طائفية " انت عارف انا ابن مين " لان ببساطه العبارة الي غرقت مكنتش راكبها مسحيين فقط أو مسلمين فقط ولكن كان راكبها بالتاكيد فقراء المصريين والقطار كان برده راكبه فقراء المصريين والماء اللي بيجيب فشل كلوي بيشربه فقراء المصريين( الأغنياء بيشربوا مياة معدنية ) و القمح المسرطن كان برده لفقراء المصريين ( الاغنيه عقبال املتكم بياكلوا كيزر وبيركبو الطيارة الخاصة وبيفطرو في باريس ويتعشوا في انجلترا ) ده حتي لو روحت كلية عسكرية هيسالوك بكل بجاحة مين وسطتك في اكتر من كدة تميز وطائفية في اكتر من كده ظلم لطبقة تستحوذ علي 85 في المائة من المصريين كلامي هذا ليس بدافع الحقد علي الاغنياء زادهم الله بس يكون في تساوي بين تعامل الدولة مع الاثنين وللأسف حكومتنا بقيت تخلط السياسه بي البيزنس ويستغلوا سلطتهم خصوصاً ان كل الوزراء رجال اعمال واغنياء جداً واغلبهم لا يعرفوا المصري الحقيقي و جمال بيه مبارك من كبار رجال الاعمال وارصدته بلغت 600 مليون دولار حسب ما قالت مجلات الاقتصاد الامريكيه التي تحترم قراؤها وطبعا في مصر جمال لم ولن يكذب المجلة لان ببساطه تكذيبها يعني ان يعترف بالحقيقة ويفصح عن فلوسه انا اطلب من الشعب ان يتحرك ضد الطائفية التي تقسم الناس علي حسب حسابات البنوك يعني مثلا احمد عز , واحمد المغربي , والجبلي وكتير من اعضاء الحزب الواطي ( غلط مقصود فهو فعلا ليس وطني بل واطي وابن كلب ) وهم في نفس الوقت المتحكمين في اقتصاد البلد هل يصح ان من يحمي البلد هوا المتاجر بيها ولاكن انا استبشر خير لان العمال بدات لهم صحوة قوية واحتجاجات وبدات المطالبة بحقوقهم وربنا معاهم وعقبلنا يارب محنا كمان نطالب ونخده وانشاء الله هنخده تالت ومتلت وسلام يا طائفة الفقراء انا مش فضلكم انتو عرفين انا ابن مين

أين المصريين

حد شاف مصري انا والله بتكلم جد في حد شاف واحد مصري انا بقالي سنين مش لاقي ولا مصري كل اللي قدامي خيال مإته لايمكن من نراهم في شوارعنا مصريين لايمكن هؤلاء الناس هم من قاموا بثورة 19 او حتي حربوا اكتوبر او حتي بنو السد العالي او الاهرامات او ابو الهول او اصحاب الحضارة صدقوني انا والله باتكلم جد حد شاف واحد مصري . لايمكن ان يكون في مصري وساكت علي اللي بيحصله مياه ملوثه بالمجاري . خضار وبقي مسرطن . عبارات وبقيت تغرق ويموت الالاف . قطارات وبقت تنقلب وتولع ويموت الالاف . ظلم وبقي اكتر من الهم علي القلب . حتي الحريات بقيت اعمل اللي انت عايزه والحكومه تعمل فيك اللي هي عيزاه . والطيران بقي يقع . والتزوير بقي للركب ولا فتحي بيه سرور اللي مش عايز يغير كلمة " موافقة " . والبلعات لسه ملهاش غطيان . ولا الأسعار بقيت اللحمه ب 35 جنيه . والمرتبات يعيني متأكلش عيش حاف . وكمان مفيش شغل غير لولاد البيه . و التعليم باظ مع كل حاجه باظت في البلد . والجامعات ياعيني مش عارفه تطلع حتي من أحسن أول 100 جامعه علي العالم . و السرطان بقي منحه الحكومه لكل مواطن . والفشل الكلوي هديه مع السرطان . و المحسوبيه و الوسطه والكوسه بقي شعار حكومتنا . والخراب بقي انجازتهم اقول ايه بس مكلكم عرفين ده واكتر كمان بس هرجع ل سؤالي تاني حد شاف مصري بذمتكم لو في مصري بجد وشاف الكلام ده هيسكت او يخاف هيقول امشي جنب الحيط اللي وقعت علي دماغه ودماغ اهله وهوا مش حاسس هيقول اربي عيالي الي بقي مستقبلهم زفت و خراب بسبب جبننا وخوفنا يناس فكروا ولو لحظه عيال ايه اللي خايفين عليهم عشان كده سكتين عيالكم هيتشردوا لو متحركتوش وهيجوعوا وذنبهم في رقبتكم يعالم حرام عليكم اتحركوا مستنين ايه فقر وافتقرتم و جوع وشفتم و مرض وجه و بهدله وشفتم وكل حاجه بقيت زفت الزفت و انتوا فين لسه صفر علي الشمال لسه مفعول به مش نويين تبقوا فاعل ابداً طيب بجد لو حاد شاف مصري يبقي يقلي سلام لحسن طهقت

بناُ علي تعليمات السيد الرئيس

كم مرة سمعنا تلك المقوله العرجاء التي تكشف عن ان نحن في دوله الرجل الواحد الذي يملك كل شئ وباقي المؤسسات هي شكلية لا تستطيع التحرك بدون سيادته وهوا العليم بكل شئ من اول الطالبة الاء التي كتبت بحرية في موضوع التعبير الذي من المفترض انت تكتب فية اراءها ولكن كلاب السلطان لم يعجبهم فتم سقوطها ولكن نفاجأ ان بناً علي تعليمات السيد الرئيس يتم نجاح الطالبة كإن الوزارة منتظرة تعليمات الرئاسة وهيا لا حول ولا قوة هيا شكل فقط ومثال اخر عندما قال عادل امام ان له افلام واجهت صعوبات ( الجردل والكنكه , السفارة في العمارة ) هذه الافلام لم تخرج من النور الا بناُ علي تعليمات السيد الرئيس ومثال ثالث عندما رفض وزير العدل حكم القضاء لصالح القاضي لكي يتم علاجه في الخارج وطبعا جاء تدخل الرئيس ليحل الازمة ومثال رابع عند مناقشه المادة 76 لأول مرة كان كلاب السلطان ينبحوا في صوتهم ان ما نزل من عند مبارك ما هو الا بالحق ولاكن تدخل الرئيس بمكالمة تليفونية تغير مسار افكارهم ويشيدوا بعدها برائ الرئيس مع انهم كان لهم رائ اخر ولكن سبحان مغير الاحوال من حال الي حال فهل نستنتج هذا ان وزارة التربيه والعدل واعضاء مجلس الشعب كلهم طرطير ومنتظرين تعليمات السيد الرئيس الا يعلموا انهم داخل مؤسساتهم من المفترض ان يكون قادرين علي حل مشاكلهم ام نحن تغيرنا من دولة الحزب الواحد الا دولة الرجل الواحد مبارك فقط الا يعلموا ان مبارك بشر ما هوا برسول الا يعلموا انه بخطأ مثل البشر الا يعلموا اننا من المفترض اننا في دولة مؤسسات اذا لم يعلموا ذلك فالحل هوا الغاء تلك المؤسسات وجعل الرئيس هوا كل شئ , وربنا يخدكم يا طرطير السلطان ويخرب بيتكم ذي مخربتوا بيت البلد واشفكم انشاء الله في الاخرة , والسلام عليكم

مبارك الذي لا يخطأ

مبارك الذي لا ياتي الا بالحق كما يزعموا لنا اجهزة الاعلام الحكوميه متي اعترف مبارك بخطاء ارتكبه متي طلب من الشعب ان يغفر له هل مبارك علي مدي ربع قرن لم يخطاء ولا خطاء صغير علي فرض انه لم يخطاء كما يدعي كلاب امن الدوله المخلصين له وبائعي الوطن ويتغني بانهم خادمي الوطن وهم كلاب السلطان يا مبارك اعلم انك بشر وانك ستموت وان التاريخ هو الحي وسيذكرك التاريخ بكل عيوبك اعلم ان الله هو وحده الذي لا يخطاء والعناد ليست من صفات المؤمن او حتي العاقل يا مبارك ارحمنا ارحم وطن يغتصب من رجالك وامنك ومعاونيك وحاشيتك اعلم ان من ظلموا بعهدكم كثير وانك ستحاسب علي فرد فرد اعلم ان بسجونك 22الف معتقل ومنهم من اخذ حكم البراءة مرة و اثنين وعشرة ولم ينفذ اعلم ان التغير قادم لا محاله فهذه سنة الكون اعلم ان لن يدوم غير الله يا مبارك لقد تخطي بك العمر الكثير فلترضي الله بأخر ايامك اعلم ان كل من حولك لن ينفعوك بأخرتك اعلم ان الله قادر علي كل شئ وانت ضعيف امام قدرة الله يا مبارك انظر الي موريتانيا انظر كيف للمحاكم العسكريه ان تعطي للناس الديمقراطيه في انتخابات حقيقيه بدون ترشيح احد منهم انظر الي السنغال و الهند وجنوب افريقيا الم تشعر بالخجل ونحن في ذيل الامم مصر التي صنعت الاهرامات اصبحت لا تملك ان توظف ابناءها مصر لم تسطيع ان تنتج غذاءها يا مبارك اعمل ما يرضي ضميرك يامبارك كلمه اخيرة من كل مظلوم لك

حسبنا الله ونعم الوكيل

حالك يا مصر

من المحزن أن في عالمنا العربي تم تشويه للعلمانيه من قبل الحكام و الملوك اصحاب الفخامه والعظمة والسمو والسبب ان العلمانيه فكر سياسي والفكر سواء صح او خطأ سيؤدي الي وعي ثقافي لدي المواطن ومن المعروف ان الوعي يضر بكرسي اصحاب السمو لذلك اتجه هؤلاء الملوك الي تشويه صورة العلمانيه وكانوا يعلمون ان الشعب العربي يسهل الدخول اليه عن طريق الدين لذلك اتجهوا الي شيوخ السلطان وتم تشويه معني العلمانيه واصبح من يطالب بالعلمانيه كأنه يدعوا الي دين جديد مع إن انا لا اري وجه للمقارنه فالعلمانيه فكر سياسي وليست دين كي نقارنه بالاسلام وطبعا الشعب العربي بسبب نقص الوعي شوهت العلمانيه في فكره لدرجه انك تري في الشارع العربي من يهاجم العلمانيه وكانه يجهاد في سبيل الله دون ان يعلم ماهي العلمانيه وما اتجهاتها كل ما يعلمه كلمه واحده ( فصل الدوله عن الدين ) وطبعا طالما فيها اسم دين يبقي الفكر العربي يتجه الي الجهاد من اجل الدين دون ان يفكر ولو لحظه او يقرأ عن العلمانيه ولكن حان الوقت كي يعلم الشعوب العربيه عن ما هي العلمانيه وان يتم تزويده بالثقافه السياسيه ليعرف حقوقه و واجباته حان الوقت ان يعرف الفرد انه عضو مؤثر في الدوله وليس كما نري من نظام مستبد يجعل من عصابه يتحكمون بالشعب لدرجه ان اصبح الشعور العام اتجاه الشعب انهم تحصيل حاصل ( وكما يردد .. دي بلدهم مش بلدنا او .. واحنا هنعمل ايه مهما اللي عيزينوا هيعملوا ) يجب ان يعلم الشعب اننا قوة وليس ضعف و يجب ان يدرك ان كثير من بلدان العالم اصبحت اكثر منا رخاء وديمقراطيه وتقدم بسبب سلبيتنا ويجب ان يعلم الشعب ان المطالبه بالحق ليست شحاته من حاكم ظالم ويعلم ان هذه بلده وليس بلد الملوك والسياده ومن الممكن ان يطول الظلام لكن المؤكد ان نري الشمس .. نرجع الي موضعنا الاول ما هي العلمانيه , العلمانيه هيا فصل نظم الحكم عن شيوخ السلطان .. لماذا لان كثير ما يستغل الدين في الضحك علي الشعوب وليس معني هذا اباحة المحارم في المجتمع بل تطبيق الشريعه بين المواطنين مثال كلنا نعلم شيوخ الازهر والمفتي وكم هم اصبحوا يبيعون الدين للحاكم لدرجه اباحه الحرام وتحريم الحلال مثال اخر شعار( الإسلام هو الحل ) الذي يرفعه الاخوان هذا الشعار القاتل الذي يلعب بمشاعر الناس وعواطفهم دون ان يقدم حل حقيقي فللاسلام اتجاهات وتيارات وآراء واختلافات وافكار . اي اتجاه او اي فكر تقصد هل تريد الحكم بالفكر الوهابي ام السلفي ام الاسلام الليبرالي .... الخ سيطلع واحد منهم يقول الاسلام كما انزله محمد ( صلي الله عليه وسلم ) وهذا دليل علي استمرارهم بلعب بمشاعر الناس لقد اختلف علماء كثيرين في الاراء وانتم تعرفون ما انزل علي الرسول وصامتين انا لا ارفض ان يكون لكم مرجع ديني لكن اطالب ان تضعوا لكم منهج وآراء معروفه وليست مبهمه هل ننسي ان السادات كان يصف نفسه بالرئيس المؤمن وكان يعتقل المعارضين هل ننسي ان حكام السعوديه يصفون نفسهم بانهم خدام الحرمين وهم سارقي الشعوب هل ننسي معمر القذافي وهو وشيوخ السلطان من حوله ماذا يفعل بالشعب باسم الدين من فضلكم ارحمونا وضعوا برنامج واضح وصريح عن ماذا ستفعلون اتجاه عمل المراة او ماذا ستفعلوا اتجاه المسيحين الذين يرغبون في المشاركه في السلطه هل ترضي بمسيحي يكون رئيس للجمهوريه قبل ان يعترض احدكم يفكر ولو للحظه واحد هل مصر للمسلم فقط ام لجميع المصريين ومن المستفيد من شعور المسيحيين بالاضهاد وشعورهم انها ليست بلدهم هذه بلد لكل مصري وكل مصري من حقه ان يطمح في السلطه والذي يحكم مصر ليس بحاكم للمسلمين بل حاكم للمصريين ثانيا هل يريد اي مصري ان يري حزب اخواني وحزب مسيحي وحزب صوفي وحزب سلفي وحزب نوبي وحزب بدوي هل هذا ما نريده الفكرة من الاحزاب هيا خلق مناخ لتنافس الأفكار لزيادة وعي الشعوب وزيادة المنافسه الفكريه التي تخلق الابداع السياسي ولكن لو اصبحت الصراعات دينيه وليست فكريه واصبح التكفير منهج للحوار هل ستكون مصر في ذلك الوقت كما نريد .. اكرر لكي لا يفهمني البعض غلط تطبيق الشريعه بين الافراد امر واجب انا اتكلم بين العلاقه بين الحاكم والمحكوم والاحزاب وهذه النقطه تركها لنا رسولنا الكريم شوري بين المسلمين نداء اخير الي كل من يريد ان يفكر لكي ينهض بهذه الامه اوقفوا المتاجرة بالدين اوقفوا الفتاوي التي اصبحت كل لحظه واصبح من يعلم ومن لا يعلم يفتي اوقفوا السلبيه التي اصبحت من سمات المصري اوقفوا الجمود الذي يسمونه كلاب السلطان بالاستقرار . اي استقرار في ظل فساد وعنوسة تقدر ب 9 مليون وبطاله تقدر ب 8 مليون واستغلال سلطه اصبح في كل شئ ابن الرئيس عضو لجنه للسياسات ( معمولاله مخصوص عشان ده ابن البيه مبارك ) اي استقرار وكل ملوك الفساد حزب وطني ( العبارة وصاحبها ممدوح اسماعيل عضو مجلس شوري وكمان متعين بقرار من مبارك باشا - اكياس الدم الملوثه وصاحبها هاني سرور عضو مجلس شعب حزن وطني ( هذا الخطأ مقصود فهو اقرب للحزن من الحزب ) المبيدات المسرطنه والمتهم فيها وزير الحزن الوطني يوسف والي هل كل هؤلاء صدفه من الحزن الوطني من اجل مصر اتركوا السلبيه اتركوا الضعف والخوف لا تتعاطفو مع المتاجرين بالدين حرروا مصر واجعلوها للمصريين والسلام ختام